มหาสมฺมตวํส

[1]

มหาสมฺมต ราชสฺส, วํสโช หิ มหามุนิ;

กปฺปสฺสาทิมฺหิ ราชา’สิ, มหาสมฺมตนามโกฯ

[2]

โรโช จ วรโรโช จ, ตถา กลฺยาณกา ทุเว;

อุโปสโถ จ มนฺธาตา, จรโก’ปจรา ทุเวฯ

[3]

เจตีโย มุจโล เจว, มหามูจลนามโก;

มุจลินฺโท สาคโร เจว, สาคโร เทว วนามโกฯ

[4]

ภรโต ภคีรโถ เจว, รุจิ จ สุรุจิ ปิจ;

ปตาโป มหาปตาโป, ปนาทา จ ตถา ทุเวฯ

[5]

สุทสฺสโน จ เนรุ จ, ตถา เอว ทุเว ทุเว;

ปจฺฉิมา จา’ติ ราชาโน, ตสฺส ปุตฺตปปุตฺตกาฯ

[6]

อสํขิยายุกา เอเต, อฏฺฐวีสติ ภูมิปา;

กุสาวติํ ราชคหํ, มิถิลญฺจาปิ อาวสุํฯ

[7]

ตโต สตญฺจ ราชโน, ฉปฺปญฺญาส จ สฏฺฐิ จ;

จตุราสีติ สหสฺสานิ, ฉตฺติํสา จ ตโต ปเรฯ

[8]

ทฺวตฺติํส อฏฺฐวีสา จ, ทฺวาวีสติ ตโต ปเร;

อฏฺฐารส สตฺตรส, ปญฺจทส จตุทฺทสฯ

[9]

นว สตฺต ทฺวาทส จ, ปญฺจวีส ตโตปเร;

ปญฺจวีสํ ทฺวาทส จ, ทฺวาทสญฺจ นวา ปิจฯ

[10]

จตุราสีติสหสฺสานิ, มขาเทวาทิกาปิ จ;

จตุราสีติสหสฺสานิ, กฬาราชนกาทโยฯ

[11]

โสฬส ยาว โอกฺกาตํ, ปปุตฺตา ราสิโต อิเม;

วิสุํ วิสุํ ปุเร รชฺชํ, กมโต อนุสาสิสุํฯ

[12]

โอกฺกามุโข เชฏฺฐปุตฺโต, โอกฺกากสา’สิ ภูปติ;

นิปุโร จนฺทีมา จนฺทํ-มุโข จ สิวิ สญฺชโยฯ

[13]

เวสฺสนฺตร มหาราชา, ชาลี จ สีหวาหโน;

สีหสฺสโร จ อิจฺเจเต, ตสฺส ปุตฺต ป ปุตฺตกาฯ

[14]

ทฺเวอสีติ สหสฺสานิ, สีหสฺสรสฺส ราชิโน;

ปุตฺต ป ปุตฺต ราชาโน, ชยเสโน ตทนฺติโมฯ

[15]

เอเต กปิลวตฺถุสฺมิํ, สกฺยราชาติ วิสฺสุตา;

สีหหนุ มหาราชา, ชยเสนสฺส อตฺรโชฯ

[16]

ชยเสนสฺส ธีตา จ, นาเมนา’สิ ยโสธรา;

เทวทเย เทวทห-สกฺโก นามา’สิ ภูปติฯ

[17]

อญฺชโน จา’ถ กจฺจานา, อาสุํ ตสฺส สุตา ทุเว;

มเหสีจา’สิ กจฺจานา, รญฺโญ สีหหนุสฺส สาฯ

[18]

อาสี อญฺชนสกฺกสฺส, มเหสี สา ยโสธรา;

อญฺชนสฺส ทุเว ธีตา, มายา จาถ ปชาปติฯ

[19]

ปุตฺตา ทุเว ทณฺฑปาณี, สุปฺปพุทฺโธ จ สากิโย;

ปญฺจ ปุตฺตา ทุเว ธีตา, อาสุํ สีหหนุสฺสเรฯ

[20]

สุทฺโธทโน โธโตทโน, สกฺกสุกฺกมิโตทโน;

อมิตา ปมิตาจา’ติ, อิเม ปญฺจ อิมา ทุเวฯ

[21]

สุปฺปพุทฺธสฺส สกฺกสฺส, มเหสี อมิตา อหุ;

ตสฺสา’สุํ ภทฺทกจฺจานา, เทวทตฺโต ทุเว สุตาฯ

[22]

มายา มหาปชาปติ เจว, สุทฺโธทน มเหสีโย;

สุทฺโธทน มหารญฺโญ, ปุตฺโต มายาย โส ชิโนฯ

[23]

มหา สมฺมตวํสมฺหิ, อสมฺภินฺเน มหามุนิ;

เอวํ ปวตฺเต สญฺชาโต, สพฺพ ขตฺถิย มุทฺธนิฯ

[24]

สิทฺธตฺถสฺส กุมารสฺส, โพธิสตฺตสฺส สา อหุ;

มเหสี ภทฺทกจฺจานา, ปุตฺโต ตสฺสา’สิ ราหุโลฯ

[25]

พิมฺพิสาโร จ สิทฺธตฺถ-กุมาโร จ สหายกา;

อุภินฺนํ ปิตโร จาปิ, สหายาเอว เต อหุํฯ

[26]

โพธิสตฺโต พิมฺพิสารา, ปญฺจวสฺสาธิโก อหุ;

เอกูนติํโส วยสา, โพธิสตฺโต’ภินิกฺขมิฯ

[27]

ปทหิตฺวาน ฉพฺพสฺสํ, โพธิํ ปตฺวา กเมน จ;

ปญฺจติํโส ถ วยสา, พิมฺพิสารมุปาคมิฯ

[28]

พิมฺพิสาโร ปนฺนรส-วสฺโส’ถ ปีตรํ สยํ;

อภิสิตฺโต มหาปญฺโญ, ปตฺโต รชฺชสฺส ตสฺส ตุฯ

[29]

ปตฺเต โสฬสเม วสฺเส, สตฺถา ธมฺมมเทสยิ;

ทฺวาปญฺญาเสว วสฺสานิ, รชฺชํ กาเรสิ โส ปนฯ

[30]

รชฺเช สมา ปนฺนรส, ปุพฺเพ ชินสมาคมา;

สตฺตติํส สมา ตสฺส, ธรมาเน ตถาคเตฯ

[31]

พิมฺพิสารสุโต’ชาต-สตฺตุตํ ฆาตียา’มติ;

รชฺชํ ทฺวตฺติํสวสฺสานิ, มหามิตฺตทฺทุการยีฯ

[32]

อชาตสตฺตุโน วสฺเส, อฏฺฐเม มุนิ นิพฺพุโต;

ปจฺฉา โส การยี รชฺชํ, วสฺสานิ จตุวีสติฯ

[33]

ตถาคโต สกลโลกคฺคตํ คโต;

อนิจฺจตาว สมวโส อุปาคโต;

อิติ’ธ โย ภยชนนิํ อนิจฺจตํ,

อเวกฺขเต ส ภวติ ทุกฺขปารคูติฯ

สุชนปฺปสาทสํเวคตฺถาย กเต มหาวํเส

มหาสมฺมตวํโส นาม

ทุติโย ปริจฺเฉโทฯ

ตติย ปริจฺเฉท